Bankomat za mleko
Čim je mojčika denes počela treskati z vrotima znali smo da vrog šolu bere.
Mom smo se dobrovoljno postrojili v kuhnji kaj soldoteki dok je njoj para nad vuha išla. Japica, srčeko, jo, pucka, dečec, soseda i kujsek.
Saki smo si vu glovi premišljovali kaj smo hudoga naprajili.
Japica: ti sveca, sigorno je vidla dok sam Franci namigoval. Gotov sam! Zbogom joko!
Srčeko: ne vrog kaj je našla one črve za ribičijo kaj sam jih porinul vu frižider. Gotov sam! Zbogom bote i ribe!
Jo: jezoš meni! Zeznala je da sam ji fertofa skurila z peglom. Gotova sam! Selim se zutra!
Pucka: na dobro! Onoga pekmeza za buftline je čuvala kaj zloto. Kaj jo morem kaj mi se našel na poto. Gotova sam! Bom rekla da je brat. Pem v soboto itak na spoved.
Dečec: kaj bi moglo biti? Pračka? Sam de stajil smrdeče štomfe? Sam ji vrnol pet evriji dok me poslala v štacun? Gotov sam! Najbolje kaj se priznam pak kaj bo.
Soseda: jezoš i kristoš! Čula je kaj sam Magi zonjo rekla. To grdoba me je morala potračati! Gotova sam! Več mi nigdor na dola žganico.
Kujsek: pok se poštar tožil nome? Gotov sam! Nikaj več od kosti! (To za kujseka si samo tak mislim. Bog zno kaj je bokcu črez glovo išlo)
A onda nas mojčika odmeri kaj kažnjenike v reštu i pove
– em so to ne istine! Ste vidli koga so vroga zmislili? Bankomata za mleko!!!
– to je mlekomat..(proba povedati mali)
– sam te kaj pitala!? Valjda jo znom! Na ti vero i tomu bankomato! Zoto ga i je tuljko z temi elergijami. Of se spuhne, onomu se koža gulji, kišejo, brešejo… a da so krave bile vu štalami so si bormeš bili zdravi! Fučkaš ti cecke na gombe!
– je, to i jo velim (počne japica)
– naš tiho! No glečte, si smo perje čehali, meli trebljotve i nišče se ne zadošil a ve? Krave so zamenili zotim tetrapakima, bankomatima-vrogomatima i se je dišlo vrit! To mleko štero ve pijemo nigdor krave ne vidlo!
Joj da ste vidli kak smo si mi si odehnoli. Nesmo mi ništ krivi. Krave so krive!
Tak je ona gombala i zide v ganjk.
Dobro je! Preživeli smo. Soseda mom vdropi jeno žganičko. A onda smo jo čuli kak viče
– a ti (japica), bi ti bilo bolje kaj išel okolisti. Ti pak (srčeko), zutra boš za zojtrek jel črve. Ova tam (jo), pijac ti zutra dela. I tržijo fertofe. Šmrkljivka (pucka), spoved ti ne vredi za pekmez! Šmrkljivec (dečec), ti boš svoje išče videl. Đurđa (soseda), od ve pre Magi pi žganico a ti kujsek ima da natepeš se šteri sam kihnejo pre hiži!
Oni bodo krave vun z štale! Vragovlje jano!
P.s.
Ve vidite da je ne bilo bez vroga! Išče neznamo što jo je tak raskuril a vi ak vupate pitajte. Ali, bolje nejte. Vidite i somi zakaj.
Bog z vami!
*********************************INTERMEZZO**********************************
