Opasna višnja
Ste vi znali da je višnja joko opasna? Neste? Ve vam povem zakaj.
Hodim jo vjutro po grunto kaj poberem bombe štere stovlja kusica i spozim da je višnja, kaj smo jo loni posadili, rodila. I to cele dve višnje! Tak jo vesela dojdem v gonjk i spozim srčeka kak z novinaj ide na zahod pak mo velim:
-i, kaj si ti mej ne to mogel reči?
-kaj? Pita on onak usput
-pak to da je višnja rodila!
Isosek, on vam je v jeni minoti spremenil 50 nijansi sive, črlene i zelene. Zgrajil se za herc i bormeš sam mislila da ga je šlagerec strefil ili ga tak šrojfi od slatke kove. A onda je počel…
-čuj picika, jo ti s tem nemam ništ! Jo sam bil pre Višnji sam jenpot dok sam ji struju slagal. Dobro, mortik još šteri pot potlji jer joj je trebalo nekaj zroštati a ne ji je bil nišče pre roki ali sam kaj boš znola jo sam ji mom rekel da sam jo pošten i srečno oženjeni i da se pred menom nemora prešetovati v kombinejo. Evo, pitaj Mireka, on je bil z menom. Praf za praf, mali dečec je isti Noci. Ne kaj bi jo to videl na svoje oči nego tak povedajo dečki v krčmi. Evo, nej vrog crkne ak lažem!
Vuto je doletela mojčika z kuhnje i vdropila ga z kuhinjskom krpom po tivki.
Japica je sam klimal z glovom i rekel – dečko drogi, ve nit ne moraš na zahod. Itak si se zasral.
A jo? Jo sam mo vudrila sankcije kaj Evropa Rusiji. I sam kaj bote znali, nek mi nišče ne spominje Višnje niti višnje! Nigdor pak niti onda!
Suzana Martinuš
*********************************INTERMEZZO**********************************
